Mittlerwile isch das jetzt scho de föifti Jahresbricht wo ich schriebe. Heieiei. Die Jahre ziehen ins Land.
S’Jahr 2002 hät ja us Sportingsicht mit emen wahre Paukeschlag aagfange. A de letzte GV simmer mit ziemlich abgsagete Hosebei dagstande und es hät sehr viel z’diskutiere gä. Inklusive Pause fürs Nachtässe isch die letztjährig GV genau 4 Std und 10 Minute gange. Mega giga habber würded mini Chind säge. Mer händ nöd emal meh Ziit gha für de gmüetlich Teil vo de GV; wo ja eigentlich absolut zu sonere GV ghört. Defür holed mer das a dere GV na. Nach dem Jahresaafangsschock isch es dänn aber rassig berguuf gange und im nachhinein gseh isch s’2002 es total gfreuits und positivs Jahr gsi. Natürlich hät’s au Sache gä wo nöd unbedingt nötig gsi wäred. Aber die Hürdenen sind ja s’Salz i de Suppe vom Vereinsläbe und wänn alles immer glatt würdi laufe wärs ja au nöd interessant.
Circa 1 Monet nach de GV hät für de ganzi SATUS Dietikon es neuis Ziitalter aagfange. Am 4. Feb 2002 isch www.satusdietikon.ch ufgschalte worde und euise Verein isch plötzlich au uf em internet presänt gsi. En chline Schritt für euis, aber en grosse Schritt für d’Mänschheit, oder umgekehrt, je nach dem wie mer’s aalueget. Uf all fäll isch die Webside würkli s’Zäni und währed em ganze Jahr sind all euisi Aktivitäte textlich und bildlich de grosse wält zuegänglich gmacht worde. All euisi Verwante und Bekannte vom Nord bis zum Südpool chönd jetzt via internet a euisem Vereinsläbe teilnäh. Ich chan eui die Site würkli nur wärmstens empfehle. Lueged ine wänn ihr glägeheit händ. Sogar de Max Wyser hät mer letzt Wuche am Telefon gseit: „Weisch, jetzt woni Internet han isch lässig, channi immer chli go luege was passiert im Sporting.“
Am 14.März isch GV vom Haupgverein gsi. Det isch’s meh oder weniger um euises Überläbe gange. Hetted mer det das beatreite Gäld vom Hauptverein nöd übercho, wärs nöd so luschtig gsi. Rsp. übercho hetted mers ja scho, aber nöd so wie mir’s beatreit händ. Anyway, mit eme riese Ufmarsch vo Sporting Mitglieder, es paar träffende Wort zur richtige Zit und toller Understützig au usem Lager vo de Turnerinne, Fraueriege und em Wassersport hät de Sporting Aatrag gäge de Aatrag vom Hauptvorstand mit 60:23 Stimme gwunne. Das Resultat hät mir, mal ganz Abgseh vom Gäld, er riese Freuid gmacht und ich bin uhure stolz gsi uf de Sporting . Mir händ bewiese das mir e Riege sind wo zämmehebet und zämestaat wänns drufaachunt.
Die nächsti Station im Jahresprogramm isch’s Jasse i de Heimat gsi. Zwölf Jasser händ um de Sieg g’jassed und die zwei Willy’s sind schlussändlich Erste und Zweite worde. Merci Willy Feurer fürs organisiere und danke Hermann für de Bricht.
Im Mai hät dänn d’Fustballsaision mit Turnier und Meisterschaft aagfange. Da wetti am Bricht vom Spielleiter nöd vorgriffe, aber d’Höhepünkt verrati halt glich scho. Mindestens d’Höhepünkt us minere Sicht. Das isch sicher mal de Sieg am immer sehr stark bsetzte Auffahrtsturnier i de Holzmatt gsi und natürlich au de heiss umkämpfti Cup-Match gäge de CH-Meister Jona. So viel Zueschauer sind warschindli na gar nie amen Aalas ufem Steinmürli gsi.
D’Vorstandsitzig vom 20.6. hämmer churzerhand abgseit, wills eifach nüt z’sitze rsp, z’bespräche gäh hät. Bös isch uf all fäll niemert worde wäge dem.
S’Musikfest isch chli en Wermuetstropfe gsi. Sonen riesige Iisatz vo Vielne und no de riesiger Iisatz vom Ivi und em Hucky, wo zwei Weekend fascht im Zält une gwohnt händ, isch leider vom Publikum nöd belohnt worde. Irgendwie schaffts de Satus a söttige Fäschter eifach nie uf d’Sunnesite. Am Schluss sind alli froh gsi, das mir wenigstens nöd na drufgleit händ.
D’Velotour nach Döttige zum Roman isch dank de Initiative vom Dominik wieder emal e Velotour gsi. Ganzi 13 Lüt händ de Wäg in Aargau mit dem Velo under d’Reder gna. Die Letzte sind dänn am morge am halbi vieri wieder zrugg in Dietike gsi.
Am Stadtspieltag hämmer chli verseit oder sind nach ere lange Saison eifach fustballmüed gsi.
Am Roli sini Papiersammligs-OK-Premiere am 20. Septämber isch au bestens über d’Bühni gange. Ueber d’Bergtour vom 26-28.Septämber hani ich mir gschwore das i keis einzigs Wort meh schriebe und am 11. Oktober isch dänn na das vom Peter Ley, anstelle vom Chegle, organisierte Boccia gsi. Mit allne wo ich gschwätzt han wo am Boccia teilgnah händ, sind sind würkli voll begeisteret gsi. So begeisteret das mir de Aalas im 2003 wieder im Programm händ. Als Abschluss vom Jahr hät d’WM/EM stattgfunde.
Tja, das wars, das Jahr 2002. Auf ein neues im 2003. Ich freui mi druf.