Jedesmal bevor ich mit em Jahresbricht aafange, lueg ich die frühenere Jahresbricht, wo ich gschriebe han, dure und hoffe das mich das ächli inspiriert. Im Jahresbricht 2001 han ich gschriebe, dass d’Esther Schasse na eis Jahr Hauptverein Präsi macht. Kein Nachfolger isch in Sicht gsy. Hauptverein wie weiter, han ich det i mim Jahresbricht gfräget. D’Esther hät dänn de Peter Ley aabicklet. Mit ihm hät sie im 2002 s’Präsi-Amt zäme usgüebt. Sit de Hauptverein-GV im Frühelig 2003 isch de Peter alleinige Präsi. Und ich muess säge: „Huet ab!“. Er macht sie’s Amt super guet. Er setzt sich enorm ii für de Satus und er isch würkli de richtig Maa am richtige Platz. Das säg ich jetzt natürli nur will er nöd ume isch. Wänn er da wäri dürft ich en scho nöd so lobe. Dänn näbed em Hauptverein-Präsi isch und blibt er für mich au na e beliebti Zielschiebe für Schuelhusabwartwitz. Uf jede Fall müend mir euis um de Hauptverein wenig Sorge mache. Dä isch in guete Händ. Aber was mer müend mache, isch de Peter understütze. Mer sötted ihm hälfe wänn er Lüt für Jöblis oder Ämtli suecht. Ich möchte nöd, das mer euis plötzlich wieder fräge müend „Hauptverein wie weiter ?“ A dere Stell es grosses Dankeschön von Sporting-Seite an Peter.
Uf die Iileitig abe chann ich grad e gueti Brugg schlaa vom Hauptverein zu mine Sporting-Sörgeli. Ich nerv mich amigs au. Im Prinzip wird ja i euisere Riege sehr guet mitgschaffed. Es hät eigentli immer gnueg Lüt wo a Aläs mithälfed. Seg das e Abigunterhaltig, e WM/EM, en Stadtspieltag, es speziells Fäscht oder was au immer. Es sind zwar oft die gliche Lüt, aber wenigsten hämmer immer Lüt. Bsunders erwähne i dere Beziehg möchte ich da mal euisi Damefustballerinne. Aber…… es isch zitewis au sehr mühesam öppert z’finde wo eim under d’Arme grifft. Ich rede nöd vo sogenannte Ämter. Det simmer mit mine Vorstands-kollege und euisne Trainer sehr, ja sogar, super guet dra. Ich rede vo chline Jöbli. Vo meh oder weniger einmalige Sache. Zum Ziitpunkt wo ich dä Bricht schriebe, weiss ich genau, dass ich a de GV under Mittelige öppert sueche muess wo mit mir a d’Delegierteversammlig chunnt, öppert sueche wo de Sporting a de GV vo de Turnerinne vertritt. Und ich chan jetzt scho schriebe wie das use chunnt. Jede luegt a Decki oder is Lääre oder versteckt sich chli hinder em andere. S’gliche wämmer en Organisator für e Bergtour sueched. Das sind doch so Sache wo vieli da inne chönnted mache. 1999 isch de Helmuth de Letzti gsy wo als „Nicht-Vorstands-Mitglied“ e Bergtour organisiert hät. Emal en Bricht i d’Satus-Nachrichte oder für uf euisi Homepage schriebe. Vo irgend eme Aalas. Mal us anderer Sicht. Mer muess nöd Göthe oder Schiller heisse zum en chline Bricht schriebe. Au a de Papiersammlig gseht mer fängs nur na die gliche Lüt. Es isch mer durchuss klar, das die Ältere viellicht nüm en ganze Tag möged Zitigsbigeli stämme. Es würd niemmert öppis säge wänn mer seit, „ich chumm, aber nur am Mittag oder nur am Morge. En ganze Tag isch mer z’sträng“. En Zmittag und es Bier gits glich wäge dem.
Also, mis Aalige a eui. Mir händ en Vorstand und na einigi anderi Lüt wo sehr viel für de Sporting schaffed und wo das gärn für de Sporting mached. Suscht würdets es ja nöd mache. Doch wie gseit, all die Lüt wäred mängisch um chli meh Hilf vo eui froh.
So gnueg umegmotzt. 2003, was bliebt mir in Erinnerig? Natürlich das super Summernachtsfäscht wo würkli alles gstumme hät. OK-mässig en riese Ufsteller, will mit em Harry, Widi und Ändy händ sich a de letzte GV Lüt zur Verfüegig gstellt wo nanig lang bi euis debi sind. Mit dene Füürwehrmanne hämmer ohni riese OK-Sitzige, total locker chönne das Fäscht uf d’Bei stelle. S’Wätter, s’Risotto, die halbe Güggeli, d’Musig, s’legendäre Chuefladelotto und s’nöd weniger legendäre Füürwehrbierauto, s’Dessertbüffet, die ufgstellte Lüt und s’übrige Rahmeprogramm. Alles hät dezue biitreit, dass das en würkli unvergässliche Abig worde isch und de Sporting im ganze Verein für gueti Stimmig gsorgt hät. Es wiiters 2003er Highlight isch d’Schwarzwaldreis, organisiert vom Willy und Dominik, gsy. De Höhepunkt det, us minere Sicht, die super interessanti 2 ½-stündig Füherig im Musumsbergwerk im Schauinsland. All wo det debi gsi sind känned jetzt de Unterschied vomene Stolle und ere Strecki und wüssed wohär de Usdruck „auf der Strecke geblieben“ chunnt.
D’WM/EM vom 13. Dezember under de Leitig vom Dominik (OK) und Hugi (Wirtschaft) isch de eigentlichi Sporting-Jahresabschluss gsy. En würdige Jahresabschluss. E Rekordbeteiligung vo 8 Mannschafte à 5 SpielerInne hät für e voll’s Steinmürli gsorgt. Spannendi Spiel, es Rahmeprogramm mit Torwand und Dart und es feins Spaghettiässe händ s’Übrige dezu ta, das de traditionsrichi Aalas nöd us euisem Jahres-programm wäg z’dänke isch.
Ich hoffe das mir au im 2004 wieder sones glungnigs Vereinsjahr händ wie im 2003. Euises Jahres- programm isch richhaltig, mir büted für alli Öppis. Mached mit.