Einhundertachtesächtzg ! Seit eui das öppis ? Wen ich eui säge, 168, a was denke ihr, was chönnt ich damit meine, was chunnt eui dezue in Sinn? Die rächnerisch begabte denked jetzt villicht: Easy, 168 isch hundertsiebzig minus zwei, oder au zwei mal vieredachtzg. Richtig, aber doch falsch, will das meini nöd. Wieder anderi wo sich in Rächt und Ordning uskenned vermueted: ja logisch, er meint Paragraph 168 Strafgesetzbuch „Störung der Totenruhe“. Aber au das isch falsch. Sottig wo gern reised denked: aha, 168 Zeiche het de längsti Ortsname uf de Wält. In Kurzform bekannt als Bangkok, aber de offiziell voll usgschribni Name vo de Stadt Bangkok het i de Thai-Sprach 168 Zeiche. Das isch Weltrekord, kein Witz aber halt au nöd das wo ich meine mit 168. Sottig wo sich im Fuessball uskänned säged sich: Vor 168 Spiel het GC s’letzt mal gunne. Fühlt sich zwar so aa und isch au fascht richtig, aber au das hani nöd gmeint mit 168.
Nei, 168 muess ja au öppis mit em Sporting z’tue ha, suscht hetti die Zahl i dem Bricht nüt verlore.
D’Lösig isch: Zellt mer d’Amtsjahr vo de einzelne aktuelle Vorstandsmitglieder vom Sporting zäme, den chunnt mer uf 168 Jahr. Nöd schlächt würdi meine. 168 Jahr Vorstandarbeits Erfahrig sind mit de Füehrig vo euisere Riege betraut. Mir sind 10 Lüt, d.h. im Schnitt isch jede scho sit 16,8 Jahr debi. OK, mir hend mit em Willy en Dinosaurier under euis. Wemmer sini 31 Jahr abzellt und den dur 9 teilt, chunnt mer immer na uf en Durchschnitt vo 15,2 Jahr Amtstätigkeit.
Mich hetts scho lang wunder gna, wer bi euis im Vorstand sit wen debi isch. So hani gester abig mal agfange Ordner mit alte Protokoll z’wälze zum das usefinde. Näbedbi hani au na usegfunde sit wen das es euisi WM git. Immene Sitzigsprotokoll vonere Vorstandsitzig im Herbst 1992 hetts gheisse mer welli für’s 20-jährige WM-Jubiliäum chli öppis speziells mache. D.h. es git d’WM also scho sit 1972.
Euise Benjamin im Vorstand isch de Roli Grünenfelder, er isch sit em Jan 2006 als Biisitzer gwählt, het aber früehner scho mal 2 Jahr als interims Turnierverantwortlicher im Vorstand gschafet, zu dere Ziit wo de Mirko uf Wältreis gsi isch. Turnierverantwortlicher isch de gsy wo euises damalige Limmattaler Hallenfaustball Turnier organisiert het. Also, somit het de Roli 7 Jahr Vorstandsarbeit gleistet.
Zweitjüngstes Mitglied isch d’Andrea Ganzoni, sit 9 Jahr (Jan 2002) isch sie Beisitzerin als Abgeordneti vom Frauefustball. Sie het damals d’Petra Widmer abglöst.
De Heinz Järmann isch sit 13 Jahr, d.h. sit em 1997 Wirtschaftschef 2 bi euis.
De Dominik Feurer isch sit em Dez 96, also sit 14 Jahr im Vorstand. Immer in wächslende Ämter. In Vorstand cho isch er als Teil vom Spielleiter-Gremium. Via Spielleitergremium sind sowieso viel Vorstandsmitglieder ine cho. Spielleiter, Internet, Kontaktadresse FB, ja, mängisch het mer müesse en Titel für de Dominik erfinde. Jetzt heisst sind Job Sportchef und isch wohl au die richtig Bezeichnig für ihn.
Eis Jahr länger debi isch de Roger Widmer. A de GV vom 9.12.95 isch er au als Teil vom Spielleiter Gremium in Vorstand cho. A de GV 1997 het er de Job als Aktuar übernah.
Als nächschts chömmed zwei wo am 12.12.1992, vor 18 Jahr, in Vorstand ufgna worde sind. De Mirko und de Hugi. De Hugo Gehrig, afänglich als Vize-Wirtschaftschef aastell vom Felix Widmer, im 97 den als Wirtschaftschef 1 wo de Hansruedi Looser usgschiede isch.
Em Mirko Egli, wie chönntis anders si, hetts de Ärmel au via Spielleiter Gremium inegna. Er isch den au mal Turnierverantwortlicher und Sportchef gsy und sit em Januar 2002 für euisi Finanze zueständig.
Mit 20 Jahr Vorstandsarbeit jubiliert das Jahr de Thomas Michel. Er isch sit em Dez 1990 debi. Sit em Jahr 2000 als Bisitzer, vorher vieli Jahr als Vize-Oberturner oder als Oberturner.
Sit 23 Jahr bin ich chli am mitschäfferle. Am 12.12.1987 bin ich für de Hans Steinwandter als Biisitzer in Vorstand cho. Bin den au mal Turnierverantwortlicher gsi und halt au im Spielleiter Gremium. 1996 den eis Jahr Vize Präsi und sit en Dez 1997 als „el presidente“ uf de Pischte.
Tja, und jetzt…… 31 Jahr debi und damit de Rückzug us em Vorstand wohlverdient. De Willy Feurer. Wo de Ernst Basler immer lüter vomene Rücktritt als Präsident het aafange rede, het sich de Willy am 15.12.1979 als Vize-Präsi wähle lah und eis Jahr später s’Männerriege Präsidium übernah. 17 jahr bis in Dez 97 isch er Präsi gsi und sit det bis hüt als Vize-Präsi a minere Site.
A dere Stell es grosses Dankeschön a alli Vorständler. Ich glaub miteme Vorstand wo 168 Jahr Erfahrig het cha nüt schief ga mit euisere Riege. Irgendwie wärded mer das Schiff immer schaukle.
So das isch jetzt halt mal nöd en Jahresbricht im übliche Sinn worde, sondern ehner en Rückblick bis is 1979. Aber ich chan ja den s’nächst Jahr wieder verzelle was s’Jahr dur so passiert isch.
Uf all Fäll hoff ich das mir au im 2011 chönd zäme spörtle, zäme d’Kameradschaft pfläge, zäme schaffe und zäme fäscht. Mached alli mit, nur so bliebed mir was mir sind. En gsunde Sporting Satus Dietike.