[et_pb_section admin_label=“section“]
[et_pb_row admin_label=“row“]
[et_pb_column type=“4_4″][et_pb_text admin_label=“Text“]Ja ebä, da wäri mal wieder am Jahresbricht schriebe. E zündendi Idee hani bis jetzt nanig gha. Letzt Jahr isch biz eifacher gsi. D’Piemontreis het reichlich Stoff und Material bote für en lange Bricht. Und so dicht gedrängt isch euises Jahresprogramm ja nüm, das mer vorig Aaläss zum drüber brichte het. Allgemein fallt mir uf und das isch ja scho lang e Tendänz, dass immer weniger Mitglieder a de Aläss sind. Lueged eui mal ume wieviel mir da im Saal sind. Jetzt, aso jetzt Fritigabig oder eher Fritig Nacht woni am töggele bin, würdi schätze das mir morn (also jetzt woni de Bricht vorläse) am GV Abig so 22 Mitglieder werded si. Villicht wirdi positiv überrascht, den hetti Freuid. Villicht bini mit de Schätzig näch dra, den hetti ganz es bizli Freuid, eifach dasi de Verein guet känne. Aber es wer kei lässig Freuid. Eher so e Schiss-Freuid. Ja, irgendwie bini langsam müed immer ufzrüefe das d’Mitglieder euisi Aaläss sölled bsueche. Ich mein ich han scho gfühlti 34829 Mal in Jahresbricht, Versammlige a GV’s usw versuecht d’Mitglieder z’animiere, ufzrüttle und dezue z’bewege a euisne Verastaltige teilznä. Ich chan aber nöd behaupte das ich sehr erfolgrich bin i dem. Hey, bim Jasse hets knapp glanget für en Tschau Sepp, bim Grillfäst sind 36 Lüt gsi, a de Bergtour 13 und bim Chegle zerst 7 und später 8 Spieler und a de WM mit viel „Fremdbeteiligung“ sind 16 Fuuster zäme cho. Alles rächt bescheideni Zahle. Irgendwie dunkts mi mengisch es fählt s’Interässe a de Aläss. Guet, mir werded immer weniger, werded immer älter, hend immer es grössers Aagebot vo Freizitbeschäftigunge und immer meh Verpflichtige segs im Bruef, Familie oder Fründeschreis. Trotzdem hetted all euisi Aläss meh Teilnehmer verdient. Es steckt nämli immer viel Arbeit dehinder öpis z’organisiere. Und es sind ja au meistens die gliche wo en Aalas uf d’Bei stelled. Wenig Lüüt schaffed viel für leider schlussäntli wenig Lüüt. Das macht nöd immer Spass. Aber eis chani eui säge. Die wo debi sind a de Aaläss hend immer viel Spass und das entschädiget den die wo organisiert hend und die wo nöd debi sind sind halt eifach sälber Gschuld.
Papiersammlig, GV Hauptverein, Frühlingsversammlung, Jassen, Faustballmeisterschaft und Cup, Damenmeisterschaftsspieltag, Auffahrtsturnier, Wiwahe Hurot-Fest, Velo-Tour, Steinstossen, Sommer- versammlung, 50-Jahre Jubiläumsfest, Stadtspieltag, Frauen- und Männerriegentag, Frankreich-Tour, Aufstiegsspiele 1.Liga und 2.Liga, Chegle, Herbstversammlig, Limmattaler- Hallenfaustballturnier, Abigunterhaltig, WM-EM und d’GV. Das isch im 1998 s’Jahresprogramm gsi und i mim erste Präsidente Jahresbricht verewiget. 25 Aaläss i eim Jahr. Hüt unvorstellbar.
Im 2019 sind’s es paar weniger gsi. Für mich persönlich s‘Highlight wie jedes Jahr: d’Bergtour. De Andy Weber het sie organisiert und es isch in solothurnische Naturpark Thal gange. Als Novum simmer vo Dietike us mit de BDB nach Wohle los gfahre. Underwägs in Berike und Bremgarte sind na Sportingler zuegstiege und die kompletti Truppe vo 13 Wanderer isch den in Wohle i d’SBB richtig Olte umgstiege. Die kompletti Truppe sind gsi zwei Rogers und je ein Heinz, Urs, Hugi, Domi, Roli, Fix, Mix, Enrique, Werni, Reiseleiter Andy und ich. De Res het am Vortag wege Rugge Beschwerde müesse absäge. In Olte den scho mal die ersti Verwirrig. Irgendwie hets gheise mer müend ufs Gleis 5 aber das Gleis 5 hets gar nöd gä. Anyway, mer hends den glich gschafft vo Olte wegzcho. Nach es paar Mal umstiege hemmer in Passwang s’Postauto verlah und de Andy het mal churz d’Route erklärt. Aso mer chan da dure, die einte wo wänd det dure oder na nöimed anderst dure und am Schluss träffed mer euis in Wasserfallen. Mir sind denn aber alli zäme gwanderet und händ ufem Vogelberg Mittagsrast gmacht. Nachem Rast het de Andy die witeri Route erklärt. Aso mer chan da dure, die einte wo wänd det dure oder na nöimed anderst dure und am Schluss träffed mer euis in Wasserfallen. Bi sunnigem Wätter simmer denn aber alli zäme gwanderet und de nächsti Rast isch im Berghaus Vogelberg gsi. Det simmer es Zittli i de Sunne ghöcklet und hend es Bierli trunke. Bevors losgange isch het de Andy na churz d’Routene erklärt. Aso mer chan da dure, die einte wo wänd det dure oder na nöimed anderst dure und am Schluss träffed mer euis in Wasserfallen. Mir sind denn aber alli zäme gwanderet. Underwegs simmer anere Lamaweid verbi cho. Einzig de peruanisch Panflöte-Spieler vom Flughafe Chlote het gfählt zum s’Südamerika Feeling komplett z’mache. Irgendwänn simmer den tatsächlich i dem Berggasthaus Hintere Wasserfallen aacho und hend zur Belohnig es Bierli trunke. Bis da ane han ich eigentlich immer gmeint alli Wäg füehred nach Rom, aber ich bin eines besseren belehrt worde. Alli Wäg füehred nämlich nach Wasserfallen. Zumindest alli Wäg wo de Andy kennt. Wommer den los sind in Richtig Unterkunft het de Andy na churz welle de Weg rsp die Wege erkläre, aber mir sind scho allizäme losgwanderet gsi. Nach de Viere hend mir den sTagesziel Berghaus Hohe Wächte erreicht.
Bi schönstem Sunneschi und herrlicher Ussicht vo de Terrasse hämmer uf eben dieser Terrasse na paar Rivella, Sinalco und Elmer Citro trunke bis es dänn en feine Znacht mit Suppe, Salat, Riis und eme Poulet-Curry gä hät. Apropos Elmer Citro, e Zwüscheinformation für all wo det mit grätslet händ. D’Bergtour nach Elm het im 2014 statt gfunde. Nach dem feine Znacht hend die einte Hose Abe und die andere Lobo77 gspielt. Irgendwänn isch es dänn richtig Bett gange. De Roli de Schlaumeier het bi de Amäldig Doppelzimmer und Massenschlag a krüzlet und het so s’Glück gha nöd müesse mit em Andy im gliche Schlag z’pfuse. De Andy isch nämlich zu höchst Form ufglofe und het de ganzi Schlag unterhalte. Irgendwänn hend den aber alli gschlafe und es isch schnäll Morge worde. Nachem Zmorge het s’erste Ziel Ussichtspunkt Chällechöpfli gheisse. Wo mir det aacho sind isch aber nüt gsi mit Ussicht. So viel Näbel uf eim Huufe hani na sälte gseh. Ja, s’Wätter isch am Sunntig nüm so prächtig gsi, aber mer sind nie verrägnet worde. Und Näbel het’s eigentlich au nur ufem Chällechöpfli gha. Erst wommer euises Ziel, de Ochse in Mümliswil, erreicht hend hets aafange Rägne. Vo det isches den Heizue gange und mer sind wieder via Wohle mit de BDB uf Dietike gfahre. Es isch e tolli Tour gsi und wie wieter obe scho erwähnt, all wo nöd debi gsi sind sind sälber Schuld.
So, ich glaub das langet für das Jahr aber ich chume halt jetzt doch na zum 34830 Mal. Reserviered eui die Date usem Jahresprogramm 2020 und nämed a euisne Aläss wie Skiwuche, Jasse, Chegle, Grillfest, Bergtour und WM teil. Es isch nämlich immer de Plausch und mer hets Lustig a dene Ver- astaltige.
Ich bin zueversichtlich, dass mir au im 2020 werded zäme spörtle, zäme d’Kameradschaft pfläge, zäme schaffe und zäme fäschte. Mached alli mit, denn nur so bliebed mir de Sporting Satus Dietike.
„el Presidente“[/et_pb_text][/et_pb_column]
[/et_pb_row]
[/et_pb_section]