Hei ei ei, wie d’Zit vergaht. Jetzt schriebi doch scho min achte Jahresbricht als Presidänt. Es dunkt mi fascht jedes Jahr gaht schnäller verbi. Aber viellicht hani das Gfühl eifach jedes Jahr weni da hocke und de Jahresbricht am schriebe bin. Nei, irgendwie gaht d’Zit würkli schnäll verbi. Es isch jetzt zum Biespiel scho 20 Jahr her sit mer i de Stadthalle vo euisne Fründe und Hälfer im Stich gla worde sind und mer gäge e Gruppe Skinheads zur Selbstjustiz respektiv Sälbsthilf händ müesse griffe. Wahrschindli s’einzig Mal wo de Satus Dietike de Berichterstattigs-Sprung vom Limmattaler Tagblatt in Blick gschafft hät. Und denn au grad na uf d’Frontsite. Nur leider hät das nüt mit Sport z’tue gha, wobi i gwüssem Sinn ja scho. Aber mit euisne Fustball Leistige hämmers na nie so wit gschafft.
Aber es git Gschichte wo na viel viel witer zrugg ligged. Im Februar 05 hani mal bim Karl Hollen-stein, wo leider jetzt verstorbe isch, en Bsuech gmacht. Im 2004 isch er 90 Jahr alt worde und will er a de letschte GV chrank gsi isch, han ich ihm s’Sporting Geburtstags Gschänk bimene Bsuech bi ihm dihei überreicht. Mir chönd euis gar nöd vorstelle was mer in 90 Jahr so alles chan erläbe. De Karl hät mer uf all Fäll ganz viel Gschichte vo früehner verzellt. Chli us de Aafäng vo de Männerriege und so. Am meischte bliebe isch mer, das si öppedie a de GV, wenn de Müller Schaggi (oder wie au immer er gheisse hät, ich chan mi nüm an Name erinnere)…. also ebä, wenn de amigs en Fuchs gschosse heb, segeds mega froh gsy, den hebs a de GV wenigstens öppis z’ässe gä. Tja, so ändered d’Zite. Hüt gits Hackbrate.
Ich glaube s’Jahr 2005 isch en Meilestei i de Fustballgschicht rsp. überhaupt i de Vereinsgschicht vo Dietike. Es isch kaum zu glauben aber es isch Tatsach worde, das in Dietike jetzt uf Fustball-ebeni e vereinsübergriffendi Fustballgmeinschaft existiert. Das hämmer am Dominik vom Satus, am Toni vom KTV und am René vom STV z’verdanke. Die drü Herre hend nöd welle, das da jede Verein fustballmässig vor sich here chnusted und über churz oder lang de Fustball in Dietike usstirbt. Sie händ sich mächtig is Zügs gleit und a allne Orte viel Überzügigsarbeit müesse leischte. Vieli sind am Aafang skeptisch gsi, ob das ächt klappe chön. Aber mittlerwille sind alli wo i de FB Dietike mitmached voll überzügt und begeistered vo dere Sach. D’Stimmig uf de Trainingsplätz und a de Meisterschafts- oder Cuprundene isch uf all Fäll grandios. Mer hätt uf ein Schlag so um di 50 neui Kumpels übercho. Und jedi Dietiker Mannschaft hät dur das natürli au meh Fans und Understützig vo näbed em Feld. Gratulation dene 3 Initiatore vo de FB. Das händ ihr super gmacht.
Tja und suscht ? Was isch suscht na so passiert ? Nöd zum normale Vereins Jahresprogramm händ zum Biespiel s’75 Jahres Jubiläum vom Hauptverein ghört. D’Fraueriege hät mit under-stützig vom Hauptverein, oder umgekehrt (wie au immer), es Jubiläumsfäst organisiert und mit de grosse Chelle aagrichted. Zahlrichi Attraktione sind bote worde und es isch würkli es guets Fäscht gsi. Ei Wuche früehner isch es anders Fäscht über d’Bühni gange. 4 wo es Jahr z’spat uf d’Wält cho sind, als das si chönnted vomene usgezeichnete Jahrgang rede, händ euis zu ihrem 40zigste Geburtstag iiglade. Au das isch es lässigs Fäscht gsi. Sie händ euis immerhin bewiese das 1965, wenn nöd en Usgezeichnete, so doch zumindest en guete Jahrgang isch.
Näbed dene beide in aaführegszeiche usserodentliche Fäschter und näbed de Fustballtermine hämmer natürli au euisi alljährlich wiederkehrende Aläss gha. Bi Schiwuche, Jassturnier, Papier- sammlig, Velotour, Bergtour (wo’s stetig liecht berguf gange isch) und bi Boccia isch jede uf sini Chöschte cho und es isch niemmertem langwilig worde. Ich hoffe das ihr au im Jahr 2006 so engagiert a euisem Vereinsläbe teilnehmed wie i de Vergangeheit. So, das em Karl Hollenstein sini Ussag usem 1973 „doch allen Schwierigkeiten zum Trotz, die Männerriege wird weiterleben“ sich wieder es Jahr länger bewahrheite wird.
„el presidente“