Vor 10Jahr a dere Stell bini doch na zimli nervös gsi. Das isch jetzt doch scho de 10ti Jahresbericht woni schriebe und ich glaub es isch na nie so knapp gsy. Es isch Samstig Morge viertel vor elfi, hüt namittag gan ich na uf Rüti em Eis im Fuste go ushälfe und hüt zabig am 7bni isch de GV Start. Zum Glück han ich d’Carmen wo mer na de Wy für d’Ehrige gat go poste. Aber heieiei und sapperlot, de Jahresbricht mal wieder. Jedes Jahr s’gliche Theater. Useschiebe bis z’Letscht und den glich na welle öppis Geistrichs und Humorvolls schriebe. Eso humorvoll han ich das Jahr gar nöd gfunde. Weiss nöd was ich da söll humorvolls schriebe.
Rund ume ghört mer im SATUS Dietike nur vo „Ufhöre und Rücktritt“. Ich han zwar scho i de letzte SATUS Nachrichte im Artikel „der Heimatsaal – Effekt“ en churze Überblick gä wo / was für d’Jöbli z’ha wäred im Satus. Aber das Heftli isch im Nov 2007 usecho und jetzt isch Januar 2008. Mir sind en Verein wo läbt, zumindest was d’Rücktritt aagaht. Chönd eui ja vorstelle, das da in Sachen Rücktritt scho wieder einiges gloffe isch. Hauptverein: näbed Präsi, vize-präsi, aktuar und tech.Leitig nimmt jetzt au na d’Kassiererin ihre Huet. Fraueriege: de gsamti Vorstand tritt a de GV im Dezämber 2008 zrugg. Jugi: Leitererinne bruchts nach wie vor. Satus-Nachrichte: De Beat macht na 3 Jahr wieter und den hört er uf. Inserate: De Max warted uf en Nachfolger. Defür Good News bi de Turnerinne, wen das stimmt wasi ghört han macht d’Zita na wieter will’s wäg de wegfallende Abigunterhaltig weniger ztue git. Apropos Abigunterhaltig, s’2007 wird wohl als das Jahr i d’SATUS-Chronik iiga, wo d’Abigunterhaltig gstorbe isch. Nöd würkli es Ruhmesblatt. Aber wemmers positiv will aaluege chammer säge das d’Turnerinne wäg dem no e Präsidentin hend.
I dene 10 Jahr woni jetzt davorne de Chasper mache isch ja d’Tendenz im Satus und au i de Verein allgemein Rückläufig gsy. Weniger Mitglieder, weniger Vorstands-Lüt, Aläss wo sterbed, Riege wo sterbed und zum Schluss ganzi Verein wo stärbed. Das isch scho lang d’Tendänz, aber so krass wie das Jahr han ichs na nie empfunde. Hmm, was will mer mache ? E Pistole chaufe und d’Lüt zur Mitarbeit zwinge ? Isch villicht au nöd grad fair. Es chunnt mer jetzt grad au nüt schlaus in Sinn und eigentlich gahts mi au nüt aa.
Warum gaht mich das nüt a ? Will mir im Sporting zum Glück die Problem nöd hend. Zumindest hemmer na jede Vorstandsposte bsetzt und niemmert redet vo Rücktritt im Vorstand. Also, mini Dame und Herre da im Heimat-Saal, ihr därfed eui glücklich schätze. De Sporting hett immer na sis richhaltige Jahres-programm und büted Aläss, Verastaltige, Trainings und Wettkämpf a. Wenn mir im Sporting die obe beschriebne Problem nöd hend, heisst das aber nöd das mir die nöd au werded übercho. Frühener oder später vertwütschts wahrschindli au euis. Drum wer ich froh wenn all immer chli mithälfed wens chönd und vorallem die Aläss au bsueched wo mer aabüted. Den wird’s nämlich ehner später als frühner wo mir mit dene Problem kämpfe müemd. Es git nüt frustrierenders als en Aalass organisiere und den chömed nur wenig Lüt.
So, es isch jetzt Zit zum go fuste ga. Entweder isch de Jahresbricht jetzt a dere Stell fertig, oder suscht schriebi später wieter……….
Jetzt bini zrugg vom Fuste und han mal gläse wasi scho gschriebe han. Uff, nöd würkli erfreulichs. Aber sooo isches ja au nöd. Mir hend ja wie jedes Jahr au viel erfreuilichi Sache erläbt. Für mich immer en Höhepunkt vom Vereinsjahr isch d’Bergtour. Jung und Alt erläbed jedesmal es tolls Weekend i de Berge und viel Lustigs i de Bergbeize und de Unterkunft. Dummi Sprüch, eis zwei Bierli und so, ghöred da eifach dezue. Und nachher isch mer immer gspannt uf de Bergtour Bricht im Internet oder em Satus-Heft. D’Skiwuche i de Flumsi und das vom Ivi is Läbe gruefne „Faustballer im Schnee“-Weekend sind au sehr beliebt. Mer gseht nur fröhlichi Gsichter uf de Föteli. Näbed Trainings, Fustball-Meisterschaft und Versammlige stönd au jährlich s’Chäsfäst, s’Jassturnier, d’Velotour, s’Boccia und WM allne für en Bsuech offe. Die Aaläss sind immer lustig, gnüssed doch das Jahr euises Agebot echli meh.
D’Organisatore freuits und ihr händ sicher Spass debi.