Ich säg jetzt nöd wie spat das es isch und obwohl ich mir fest vorgna han de Jahresbricht über Wiehnacht – Neujahr z’schriebe isch au das Jahr wieder mal nüt drus worde. Aber es het au öppis Guets. Wenni hüt abig früehner agfange het mit dem Bricht schriebe, den hetti nämli verpasst was de Zeno us sim neuie Insäktebuech verzellt hät. Hend ihr gwüsst, das es Kaisermottemändli es Kaisermottewiebli us sagehafter 10km Entferning schmöcke chan ? Hender das gwüsst ? Genau umgekehrt ischs Verhältniss bi euisne Fustball-Dame und de Nati B. Das sie als Dritti vo de 1.Liga Sommermeisterschaft 2007 eigentlich für d’Nati B qualifiziert gsi wäred, hends erst am vierte 1.Liga-Spieltag 2008 gmerkt. Nämlich det wos gseh hend das de Vierti vom 2007 fröhlich i de Nati B mitgspielt het. Aber da chammer weder euisne Dame no am Trainer en Vorwurf mache. Da het eifach DAKO, das isch Damefustballkommission, voll verseit. Die abträttendi DAKO 2007 het de neu aaträtende DAKO 2008 e falschi Schlussrangliste abgä und die hend den Oberentfelde, wo Vierte worde isch, für d’Nati B ufbote. Tja, nöd nur i de Insäktewält sondern au i de Fustballwält gits unglaublichi Sache. Das euisi Dame aber d’Nati B doch schmöcke chönd sinds i dere Wintermeisterschaft am bewiese. Letzte Winter sind sie nämli als Dritti ufgstiege und schlönd sich jetzt wacker i de zweit höchste Liga und hend scho einigi Pünkt ufem Konto. Herzlichi Gratulation a dere Stell.

S’2008 isch us Fustballsicht es erfolgrichs Jahr gsi. Zum Bispiel de Wiederufstieg vom Eis i d’1.Liga im Sommer. Nach em sensationelle Dame Team i de Nati B im Winter sind euisi Jüngste Fustballer es zweits Novum. D’U10 Mannschaft, trainiert vom Dominik und em Toni, nimmt s’erste Mal a de Meisterchaft teil und het chöne ihri erste Erfahrige und Pünkt sammle.

Am 8.Mai 2008 isch euisi Riege 60 Jahr alt worde. I dene 60 Jahr isch vieles passiert. Es isch viel turnet und scho vo Aafang a au gfustet worde. S’Restaurant Heimat isch de Ort gsy wo 1948 d’Gründig vo de Männerriege stattgfunde het und d’Heimat isch bis hüt euises Vereinslokal bliebe. Vo Afang bis hüt het d’Männerriege rsp. de Sporting sächs verschiedeni Presidente erläbt. Also zirka all 10 Jahr en Neuie. Es guets Zügniss für en Verein, dass sonen Präsi rund 10 Jahr anehebt. Vor 50 Jahr het mer de Biitrag na monatlich zahlt und er isch ein Franke pro Monat gsi. Mit em hütige Jahresbitrag vo 120 Franke kassiered mer also 10 Mal meh. A de GV 1958 hend vo 28 Mitglieder 24 teilgno unter andere au die hüt na bestens bekannte Ernst Basler und Albert Joss. Eis vo mine „Lieblings GV Protokoll“ isch das vo 1950. Ich zitiere: „Mitteilungen: Obmann Wiederkehr Thedi macht noch einige Mitteilungen betreffend Nachtessen. Leider ist Fischer Heinrich kein Fuchs vo die Flinte gesprungen und somit müssen wir mit Kaninchen vorlieb nehmen.“  Euises 60-jährig Jubiläum hemmer chli verspätet am 29. November am Abig nach de WM im Chäller vom Schuelhus Steimürli gfiered. Euises Wirtschaftsteam het es feines Fondue organisiert wo allne rund 60 bis 70 Gäst sehr gmundet hät. De Alass isch vo euisem Hofmusikant Peter Ley undermalt  worde. Ich han’s es schöns Fäschtli gfunde, nüt wilds, mer sind under euis gsi und es het mi dunkt all hend de Plausch gha.

Vor eme Jahr a dere Stell hani dezue ufgruefe euisi Vereinsaläss meh z’Bsueche. Nöd jedi Verastaltig het en neue Gästerekord ufgstellt. Guet bsuecht gsy sind zum Bispiel s’Chäsfäst im Früehlig, oder wie obe erwähnt au euises Jubiläumsfäscht. Am Boccia hets meh Lüt gha als au scho, defür sind chli wenig Wanderer a de Bergtour gsi. Mer chan nöd generell säge es seg das Jahr besser oder schlächer gsi als anderi Jahre. Säge chammer aber das euisi Aaläss und Verastaltige jedes Jahr duregfüert werded und ihre festi Platz im Vereins-Jahresprogramm hend. Ich mag mi nöd Erinnere wen s’letscht Mal en Aalass gstorbe isch. Ich bin der Meinig das isch es guets Zeiche und spricht für euis als läbige Verein wo de Mitglieder öppis büted und d’Mitglieder s’Engagement vo Organisatore und Vorstand schätzed. D’Kameradschaft, s’zäme Sport tribe, s’zäme schaffe und s’zäme fäschte werded bi euis gross gschriebe und das isch gar nöd so selbstverständlich i de hütige Ziit. Euises Jahresprogramm isch sehr vielfältig und richhaltig. Es büted für alli Öppis, mached Gebruch devo.

Ich wünsche mir das au s’2009 wieder sones glungnigs Vereinsjahr wird wie s’2008.

„el Presidente“