Es isch eigentlich jedes Jahr s’gliche Drama. Es gaht uf d’GV zue und ohni Vorbereitig bringi sone GV nöd über d’Bühne. D’Vorbereitig vo de eigentliche GV hani mittlwerwile zimli im Griff. Viel Phantasie brucht das nöd, es isch e reini Flissarbeit. Aber zu de GV Vorbereitig ghört au s’schriebe vomene Jahresbricht dezue und das isch jedesmal en zimliche Chraftakt. Schliesslich chani und willi ja nöd jedes Jahr s’gliche schriebe, drum sind Ideä gfrägt. Für de Jahresbricht da, hani denkt ich nimm mal chli s’Vereinsläbe vom Sporting mit allem was dezue ghört usenand und tues beurteile in berguf gradus und bergab. Wo tüemer euis verbessere also „berguf“, wo verschlächtere „bergab“ oder wo stagniered mehr „gradus“. Die Beurteilge sind subjektiv us minere Sicht und nöd der Weisheit letzter Schluss. Jede chan die Sache natürlich andersch beurteile, so wie er will.
Fanged mer mal bim Mitgliederbestand a. Letscht Jahr 85, zwei Usritt, zwei Bitritt, das hebt sich d’Waag, mer sind immer na 85 also gits es „gradus“. Lueged mer echli zrugg. 1997 wo ich Präsident worde bin simmer 106 Mitglieder gsi, zwüsched dure 1999 sogar 118, vo det a ischs bergab uf die hütige 85. Klar mer hend scho immer wieder Bitritt gha, aber die hend d’Ustritt, d’Todesfäll und d’Strichige nöd chöne kompensiere.
Nach de Uflösig vo de Fraueriege wo glich wie mir 1948 gründet worde isch, gibi em Hauptverein es „bergab“. Mir kenned all d’Problem vom Hauptverein und mer chan ihn scho sit Jahre mit me „bergab“ beurteile.
Chäsfäscht 2011 gegenüber 2010. Teilnehmermässig und au Verdienstmässig es „berguf“. Einewäg isch’s Chäsfäscht sit de erste Durefüerig im 2006 e sehr positivi Sach i euisem Vereinsläbe.
Fustball-Fraue, im Feld Nati B, i de Halle sogar Nati A, immer mal wieder Thema i de Präss, jetzt vo de Limmattaler Zitig sogar als eis vo sächs Teams zu de Wahl vom Limmattaler Teamstar nominiert. Euisi Fraue > e Erfolgsstory > sie krieged vo mir es „berguf“. Leider ghört mer für d’Zuekunft nöd so Positivs aber das söll keis Thema si i mim Jahresbricht.
Fustball im Allgemeine und d’FB im Spezielle. Es sind immer weniger Lüt wo Fustball spieled. Vorallem die ersti Mannschaft het nach diverse, teilwis mir unverständliche Abgäng Mühe gnueg Spieler uf de Platz zbringe. Früener het mer na alles gä, das mer is Eis chunnt, hü tisch das keis Ziel meh. Klar hend die meischte vo euis ihre Fustballerischi Zenit überschritte, trotzdem findi das schad und es git es „bergab“. Leider isch au die grossi Afangseuphoire i de FB gsunke. Villes liit im Arge und es isch au det leider so, das sich niemert so richtig um wichtigi Sache kümmeret. Also chunnt au d’FB vo mir es „bergab“ über.
Euisi WM: letschts Jahr 4 Teams à 4-5 Spieler, das Jahr 4 Teams à 4 Spieler : bergab
Stadtspieltag: letscht Jahr duregfüert, das Jahr zwenig Amäldige und nöd duregfüert > bergab
Versammlige: Früehner Früeligs-, Summer- und Herbstversammlig plus GV. Hüt na Halbjahresversammlig und GV, also es dütlichs „bergab“.
GV: letscht Jahr 40 Teilnehmer, das Jahr 30 Awesendi. S’Interässe a de GV het abgna, das git es „bergab“.
Vereinsvermöge: Ich finde das söll keis Thema si, aber glich. 1997 12‘069.-, 2011 rund 15‘000. „berguf“.
Im Vorstand simmer sit Jahre die gliche Lüt wo euises Vereinsschiffli lenked. Toll das niemert Abgangsgedanke hegt oder abgsprunge isch. Sit langer Zit s’letzt Jahr e Veränderig, De Willy Feurer isch nach 31 Jahr usem Vorstand zruggträtte, De Vizepräsi-Job hemmer aber dur de Roli Grünenfelder vorstandsintern wieder chöne optimal bsetze. Eigentlich isch das es gradus, aber will’s i dere wichtige Sparte nöd bergab gaht, wert ich das sogar als „berguf“.
Au d’Bergtour het das Jahr es „berguf“ verdient. Nöd das em Dominik sini Tour i de Riederfurka schlächt organisiert gsy wär, für’s Wätter chan schliesslich niemert öppis defür. Trotzdem gib ich de diesjährige Bergtour im und um Gantrisch es berguf. Mit 19 Teilnehmer sind zwei meh gsy als s’letschte Jahr und s’Wätter isch eifach fantastisch gsy.
D’Organisatore Suechi für Summeraalas und au für’s Jasse isch sehr schwirig und teilwis chli müesam. Es isch immer schwiriger öppert z’finde wo öppis organisiert >> zack, das git es bergab.
Defür hemmer aber au immer wieder Lüt wo sich getraued ungefragt öppis neuis uf Bei z’stelle. Siehe Miriam und Ivi mit em Bike to Flums. Das freut mi sehr und git natürli es berguf.
Alles in allem gseh het’s nur liecht meh „bergab’s“ als bergufs bi dene Pünkt wo ich vorher beurteilt han.
Das stimmt mich eigentlich grundsätzlich positiv. Solang das s’Verhältniss nöd eidütiger uf d’bergabsite kippt lieht alles na im Rahme. Nämed eui trotzdem die Bergab-Pünkt chli zu Herze und zäme wämmer versueche det wieder gradus‘ oder sogar berguf’s drus zmache.
Uf all Fäll hoff ich das mir au im 2012 chönd zäme spörtle, zäme d’Kameradschaft pfläge, zäme schaffe und zäme fäschte. Mached alli mit, nur so bliebed mir was mir sind. En durchus immer na gsunde Sporting Satus Dietike.
„el Presidente“