So, es wär wiedermal sowit. D’GV hetti vorbereitet aber de Jahresbricht wer na fällig. Es isch wie jedes Jahr scho zimli Nacht verusse. S’Jahresprogramm 2006 als Gedankestützi litt bereit, de Zeno schlaft (aber das isch mittlerwile normal) trotzdem bini chli unruhig will d’Sina na underwägs isch, aber das wird langsam au normal. Tja, d’Zit vergaht.
Weni so in Gedanke s’Sportjahr 2006 Revue passiere lahn, chunnt mer als ersts in Sinn das de FCZ Meister worde isch, als Zweits em Filipescu sis Goal es paar Sekunde vor Schluss, als nächschts es paar Schwizer mit vollne Hose bim Penaltyschüsse und den natürli na das Züri mit 8 Punkt Vorsprung i d’Winterpause isch. Aber Stop, es gaht ja da nöd ums Sportjahr 2006 sondern ums Sporting-Jahr 2006. Also, neuie Versuech. 2006. Jetzt chunnts Jahresprogramm zum Zug.
Im März isch zimli viel los gsi. Mir hend s’erste mal es Fondue / Raclette-Fäst duregfüehrt. Us organisatorische Sicht isches super glofe. Das Fest het de Sporting Vorstand g’mänatscht und es isch würkli e wahri Freuid mit dene Lüt zäme z’schaffe. Alles gaht irgendwie total easy und het doch Händ und Füess. Vo de Bsuecher hemmer nume positivs Feedback übercho. Es het Allne gfalle und das hät euis bestärkt au im 2007 es Chäs-Fäscht z’organisiere. Chli imene andere Rahme, aber d’Hauptsach wird au das Jahr d’Gmüetlichkeit und s’Chäs-Ässe si.
Ei Wuche später den d’Hauptverein GV. De Peter Ley isch als Präsident zruggrtätte. Das het er natürli scho vorher bekannt gä, aber en Nachfolger het sich leider nöd finde laa. Anere Sporting-Vorstandsitzig im Vorfäld hend mir den beschlosse das mir würded Hand büte und als Vorstand zäme mit de Hauptvereins-Vorständler de HV versueche über Wasser z’halte. De Vorschlag hemmer a de HV-GV Vorbereitigs-sitzig am Hauptvorstand underbreitet. Will sich kei besseri rsp. kei anderi Lösig ufdrängt het, isch das so aagna worde und au so de GV präsentiert worde. Und au a de GV het nöd würkli öppert öppis degäge gha und so simmer sit jetzt au na chli für de Hauptverein zueständig. Es isch es Lösig aber nöd e Optimali. Ich hoffe ja schwer es findet sich wieder en Präsident aber das dürfti nöd ganz eifach si.
Als nächsts sind „Faustballer im Schnee“, s’Jasse und d’Veteranetagig ufem Programm gstande. Zu dene Aläss chani aber nüt säge, da bini nöd debi gsi. Bald drufabe het den d’Fustballsaison afange und fast na bälder isch si für mich wieder verbi gsi. Defür weisi jetzt wie en Chrankewage vo inne usgseht. Ich wird die Saison meh als e Frust-Ballsaison als e Fustball-Saison in Erinnerig bhalte.
Im Juni den d’Papiersammlig, vom Roli tadellos organisiert, nur hend das d’Bewohner vo Dietike nöd so rächt mitkriegt, es het nämli zimli wenig Papier gha und somit au zimli wenig Batze für euis gä. Aafangs Juli simmer durch de Kontakt vom Mischi Locherer vom TC Langacker zum Gongturnier iiglade worde. Zerst es super Brunch-Buffet und den en Tennis-Plausch für Afänger bis Vorgstritteni, oder eifach en easy Tag bi herrlichem Summerwätter.
Hmm, ich merke grad, das Jahr bini nöd a so vielne Aläss debi gsy. Kei Ahnig wasi söll vo de Velotour, em Stadtspieltag oder über’s Boccia schriebe. Und d’Bergtour lahni au grad us, will über die hani scho gnueg g’schriebe und gredet. Aber guet isch si gsy. Würkli. Ussert z’oberst ufem Berg isch nöd so lustig aber suchst: Spitze!
Mir hend halt es richhaltigs Jahresprogramm. Da chammer und willmer au nöd immer überall debi si. Aber ich find euises Jahresprogramm isch es guets Zeiche. Es Zeiche vonere gsunde Riege. Vonere Riege wo s’ für Jung und Alt, für Chli und Gross, für Weiblein und Männlein Aläss het wommer gern hi gaht und mit de Vereins-Kollege und Kollegine gnüsse chan. Und mer muess emal dra dänke dases hinder jedem Alass Lüt het wo de organisiered. Und genau das findi so toll, dass es bi euis immer na Lüt het wo öpis uf d’Bei stelled. Und das plötzlich wieder mal öpis neuis i dem Jahresprogamm uftaucht. Wie voreme Zitli s’Boccia oder d’Faustballer im Schnee, die gits nämli nanig so lang. Schüched eui nöd, wen ihr mal e gueti Idee händ öpis z’organsiere. Abwächslig isch immer willkomme. Und Hilf dezue finded ihr ganz bestimmt i euisre Riege. Mached au im 2007 vom grosse Aagebot gebruch und helfed mit wens Hilf bruchet, den werde mer’s au das Jahr wieder lustig ha im Sporting.
„el presidente“