Jetzt hani grad mini Jahresbricht vom 2002 und 2003 duregläse. Letschts Jahr hani vom Haupt-verein Presidänt gschribe. Das mir euis um de Hauptverein kei Sorge mache müessed, de seg in guete Händ. Aber was mir müessed mache, seg de Peter understütze. Mer sötted ihm hälfe wänn er Lüt für Jöblis oder Ämtli suecht. Ich welli nöd, das mir euis plötzlich wieder fräge müessed:“Hauptverein wie weiter?“ Aber leider stömmer jetzt, rsp spätistens a de Hauptverein GV genau bi dere Frag. Schade, aber de Peter leit sis Amt nieder. Und warum? Will er kei Lüt für e Jugikommission gfunde hät und au suscht zwenig Understützig gha hät. Gueti Lüt finde isch überall chli es Problem. Au de Kantonalverband hät kei Lüt. Det hört de Presidänt au uf und mal schauen was usechunnt. Es hät aber au demit z’tue das en Hauptverein oder en Kantonal- verband nüt in Afüerigszeiche „rächts“ sind. Nüt rächts im Sinn vo eigentliche Riege mit Mit- glieder, wo mer öppis chan mache. Basisarbeit quasi. Das macht sicher viel meh Spass. Also ich hetti au kei Luscht Presidänt vom Hauptverein oder Kantonalverband z’sy. Aber Presidänt vom Sporting bini gärn. Da lauft öppis. Da hätts gueti Lüt wo mithälfed und öppis mached und Initiativä zeiged. So machts Spass, aber andersch ume isches wahrschindli eher fruschtrierend.
Was isch bi euis so glofe im Jahr 2004 ?
Aagfange hätts Jahr mit äre super Skiwuche i de Flumserberge. A de Föteli aa uf de Homepage, isch es det rächt luschtig zue und här gange. Im April bim Jasse händ 13 Jasser und 2 Jasserinne um de Titel gjassed. Gwunne hät de Peter Ley vorem Albert Joss und dritti isch d’Marianne Suter worde.
Dänn hät scho bald mal d’Fuschtballsaison aagfange. Ich wett am Bricht vom Dominik nöd vorgriffe, aber glich us minere Sicht d’Höhe- und Tüfpünkt churz schildere. De Höhepunkt isch sicher s’Cupspiel gäge de Schwizermeister 2003 Rickebach-Wilä gsy. Vor villne Zueschauer uf em Hätschesportplatz händ mir RiWi doch immerhin chönne de erst Satz abnäh. Bevor sie euis dänn doch uffzeigt händ, das es en Unterschied git zwüsched de erste Liga und de Nationalliga A. Als Tüfpunkt würdi d’Ufstiegsspiel in Alpnach bezeichne. Keis Spiel gwunne und ä schlächti Leistig zeigt. OK, d’Gägner sind besser gsy, aber teilwiis händ mir würkli miserabel gspielt.
A de traditionelle Velotour im Juli nach Döttige in Garte vom Roman sind 18 Sportingler debi gsi. De Roman hät es 3-fachs Jubiliäum gfired (60 Jahr alt, 25 Jahr Garte und 10 Jahr Gebiss). Em Bricht zufolge segs mal wieder en riese Plausch gsi. Die Letschte seged erst am nächste Morge am Elfi diheime aacho. Roman, eines Tages schaffis sicher au mal na a die Velotour.
Im Septämber hät de Mirko euis uf e super Bergtour is Tessin gführt. Vo de Alpe Foppa us ischs bi strahlendem Sunneschi, innere Gratwanderig mit prächtigster Uussicht, uf de Monte Lema gange. Gfreut hät mi, dass zum erste Mal au zwei Fraue mit uf d’Bergtour cho sind. Zabig ischs dänn au na rächt luschtig gsi und de Roman hät vieli neui Usdrück im Zämehang mit „Kutsche“ glernt.
Sportliche Jahresabschluss isch wie immer euisi WM gsi. Danke an Mix, Ivi, Hugi, Urs und Ernst für d’Organisation und de Iisatz währed em Tag.
Tja, mer chönnti fascht meine mir heggeds s’ganze Jahr luschtig gha und gfieret. Aber mängisch händ mir au de Plausch gha und gfäschted. So zum Bispiel am 40er-Fäscht vom Hugo, Heinz Järmann und mir oder am 65er-Fäscht vom Bert, Jo, Hans Ehring und Res.
Übrigens, mir heissed jetzt scho sit 10 Jahr Sporting. A de Frühligsversammlig vom 16.3.94 hät die Abstimmig stattgfunde gha.
Und a de GV 1994 sind d’Damefuschterinne bi euis ufgnah worde. Vo de 9 Dame wo gstarted sind, sind hüt d’ Esther Schasse, Petra Peter, Desirée Müller (dazumal Feurer) und d’Carmen Egli na bi euis i de Riege.
So, nachdem das i jetzt d’Schriftgrössi vo 11 uf 12 erhöht han, isch die Site doch na volle worde. Ich hoffe mir wärded au im 2005 wieder s’einte oder s’andere Fäschtli zäme gnüsse chönne.