Tja, was söll mer über es Jahr brichte wo de FCZ als Zweitletschte i d’Winterpause gaht. Das würd ja na ga, aber das GC z’oberst i de Tabelle staht seit doch zimli viel us, ob das es Guets oder es Schlächts Jahr gsi isch. Eigentlich wär mit  dem scho alles gseit, s‘Jahr 2012 abschlüssend beurteilt und ich chönnt de Jahresbricht a dere Stell wieder schlüsse..

S’Jahr het us Sporting Sicht scho zimli schlächt aagfange. Am 22. Januar isch die ersti Mannschaft i de Halle us de 1.Liga abgstiege. Mer muess säge mir sind zu Rächt abgstiege. Nachdem de Roger scho es Ziitli us gsndheitliche Gründ nüme aktiv Fustball spielt und will de Adi nach sini Chnüverletzig im letzte Winter nanig 100% leistigsfähig gsi isch, het euis di offensivi Durchschlagschraft gfählt. Aber au d’Leistig vo euis Hinderlüt isch nöd immer so toll gsi, drum spieled mer jetzt wieder 2.Liga. Das entspricht au euisem Niveau. Scho vor em letzte 1.Liga Spieltag het de Dominik de Rücktritt vom aktive Fustball gä. Nach 26 Jahr Fustball hend ihn diversi Gründ dezue bewoge sich nüme in es Team iteile z’lah. Er trainiert aber immer na flissig mit und denked dra, wen mal amne Turnier oder Spieltag Not am Mann isch, chammer ihn scho fräge ob er Lust het i d’Hose z’stiege.

Dänn am 8. Februar isch leider euise Stocki verstorbe. Er wird euis aber allne immer in bester Erinnerig bliebe. Spätistens wen sini Presidänte-Glogge zum Aafang vo de GV lüted oder während de GV um Ufmerksamkeit bitted, wird mer a ihn dänke. En wietere Tüfpunkt vom Vereinsjahr isch den s‘Chäs-Fest gsi. Die siebti Usgab vo dem Aalas hend nur grad 47 Teil- nehmer bsuecht und au finanziell het nöd viel useglueget. Das isch für euis Organisatore doch rächt enttüschend gsy, zumal mir euis immer sehr Mühe gänd mit de Organisation. Die ganzi Negativtendänz het den am 13.April a de Delegierte Versammlig vom Hauptverein ihre Fortlauf gna. Det hemmer s’erst Mal offiziell Diskusione gfühert wie mer de Hauptverein chan uflöse. Ich find das zwar nöd unbedingt Negativ, aber es passt guet is Bild vom Zerfall oder Rückschritt vom Vereinsläbe inne.

Au euises Fraue Fustball Team gits nüme. Nachdem sie im Winter na de Ligaerhalt i de Nati A gschafft hend, hend sie sich nüme für d’Summermeisterschaft agmäldet. Näbed Schwangerschafte und Operatione isch sicher au de fählendi Nachwuchs en Grund gsi defür. Apropos fählende Nachwuchs. S‘ U-12 Team het zwar dä Summer na Meisterschaft gspilt aber das isch die letzti Saison gsy. Mer hets det eigentlich nie gschafft „Fremdi“ Chind für’s Fustball z’begeistere. De grössti Teil sind immer vorbelasteti Chind gsi. Also Kid’s wo Muetter oder Vater au Fustball spieled. Es wieters Bispiel, s’Uffahrtsturnier vom KTV vom 17.Mai. Gaht euis zwar nüt aa, aber als FB Mitglieder simmer doch au chli devo betroffe. Na nie hend det so wenig Mannschaft teilgno wie das Jahr. Als nächsts muessi de Stadtspieltag erwähne. Ich glaube mer chan säge de isch jetzt definitv tot. Das Jahr sind mir mit de Organisation dra gsy. Nachdem de KTV s’letzt Jahr wege zwenig Teilnehmer abgseit het, sind mir eigentlich felse- fest devo überzügt das mir gnueg Spieler und Spielerinne anebringed. Denkste, trotz intensive Bemühige sind nur grad 13 Spieler uf de Liste gstande. Ich gang mal devo us, das es de STV nächst Jahr nüm wird versueche.

Aber es isch natürli nöd alles nur schlächt gsi das Jahr. Suscht müessted mer ja säge die Lage ist Hoffnungslos, aber nicht Ernst.  Nei, mir hend au gfreuits gha i euisem Vereinsläbe.

Vo euisne Seniore-Mittwuchs-Wanderer ghört mer nur Guets. Die Usflüg werded rege bsuecht und ahnschinend lauft scho fast halb Dietike mit. Nei, isch chli übertriebe aber teilwis sind längst verscholleni Satüsler wieder uftaucht und alli hend de Plausch a de Wanderige. Au de Summeralass hani positiv in Erinnerig. Alt und jung sind bim Roger dihei vereint gsy und hend sich d’Grillade schmöcke la. Au Dessert het’s gä. Ein Dessert, es Wähiebläch isches gsi,  hets leider nöd mitübercho, das wägem schlächte Wätter de Alass bim Roger diehei stattfindet und isch tatsächich vo de Bernstrass i d’Lorenzhütte und wieder zrugg balanciert worde. Zum Glück het de Wähibläch-Inhaber es Handy debi gha. Wie immer en Höhepunkt vom Jahr isch d’Bergtour gsy. De Mirko het euis is Tessin zum Ritomsee gfüert. Am erste Tag simmer vo Airolo zum Ritomsee ufe gwanderet. Det hets ime Gasthus z’Nacht gä und mer hend de Abig bi Charte- spiel, Bier, Wy und Grappa usklinge la. Is Bett simmer erst nachdem au em Roli sini tadellose Italiänisch Kenntniss kei aller aller letschti Rundi meh ibracht hend. Uf das abe chli gfrustet, het den de Roli beschlosse am nächste Morge nachli witer z’schlafe und nöd mit z’wandere. De Roger isch au im Gasthus bliebe. Wie es sich ghört het er Büecher debi gha wonner het müesse lerne. Mir andere sind den uf e super Rundwanderig via Lago Cadagno und Lago di Tom wieder retour an Ritomsee. Aber au da, es hetted es paar Nase meh därfe si. 15 Lüt hen die Tour mitgmacht und sindbegeisteret gsi.

Au d’WM, wo zum zweite Mal im Fondli stattgfunde het, het mir persönlich sehr guet gfalle. Es git immer sehr spannendi Spiel. Und das de Dominik die alti Tradition wo jede es Gschänk für d’Rangverkündigung mitbringt, wieder ufläbe la het, freuit mich sehr.

Das Jahr het aso doch nöd nume schlächts bracht, sodas mer chönd säge „die Lage ist Ernst, aber nicht Hoffnungslos“.

Ich hoff das mir au im 2013 wieder werded zäme spörtle, zäme d’Kameradschaft pfläge, zäme schaffe und zäme fäschte. Mached alli mit, den nur so bliebed mir de Sporting Satus Dietike.

 

„el Presidente“