Es paar Mitgliederzahle us de Vergangeheit bis hüt. Nöd vom Sporting, aber vom gsamte Satus Dietikon. 1985 rund 860 Mitglieder, 1995  650 Mitglieder, 2000  550 Mitglieder,  2005  400 Mitglieder,  2010  400 Mitglieder. Hüt rund 190 Mitglieder.  Ca 80 vom WSCD und ca 110 vo Sporting inkl Jugi und Passivi. Was söll mer dadezue säge ? Am beste nüt, ich glaub rein mit dene Zahle isch scho alles gseit. Mer sind am usstärbe, aber das isch ja a dere Stell scho es paar Mal erwähnt worde. E Zuekunft als läbende und blüehende Verein chömmer euis abschminke, zumindest im Hauptverein. Tja, de Hauptverein. Hüt isch er definitiv beerdiget worde. Mindestens offiziell und vorläufig virtuell bis die nötige Dokument erstellt sind. Aber dem natruure bringt nüt. Die Zeiten hend sich eifach gänderet. Das isch eso und schläckt kei Geis ewäg. Ehrlich gseit bin ich sogar froh über die Uflösig. Mit vorbereite und abhalte vo Vorstandsitzige und Generallversammlige, fallt mir es Stuck unnötigi Arbeit ewäg.. Mer muess scho gseh das nachem Abgang vo de Turnerinne, de Uflösig vo de Fraueriege und nachdem mir d’Abigunterhaltig hend müesse ufgäh, de Hauptverein obsolet worde isch. Ich glaube mir chönd de Jugendriege es guets Dihei gä. Sie isch bi euis bestens ufghobe. De Sporting isch scho immer sehr ufnahme fründlich gsy. Vor Jahre hemmer mal e Meitligruppe under de Leitig vo de Sybill Stocklauser und Maria Stellato bi euis ufgnah, will sie vom Hauptverein kei Understützig übercho hend. Wer erinnert sich ?  Oder au d’Akroko Gruppe wo de Stefan Sauter und de Marc Iselin is Läbe grüeft hend, het bi euis Unterschlupf gfunde gha. Also werded mir euis Mueh gäh d’Jugi und d’Jugileiterinne bestens z’unterstütze und ihne s’Läbe so eifach wie möglich z’mache, das sie sich chönd ufs Turne mit de Chind konzentriere.

Mängisch denki, so als Vorstandsmitglied im Sporting hesch öppis Gemeinsams mit eme verurteilte Mörder oder Schwerverbrächer. Fräged ihr eui was ?  Läbeslänglich!  So chunnts mer chli vor. Wobi de Schwerverbrächer hets fascht na besser, will bi gueter Füehrig chunnt er nach öppe 25 Jahr wieder use. Was mach ich falsch ? Bin doch scho meh als 25 Jahr im Vorstand. Wahrschindli liits a de guete Füehrig, will Nachwuchs-chräft für de Vorstand hemmer ja gnueg.

Kuperhals-Ziege, Spiegelschaf, Appenzeller Barthuhn, Wollschwein, Rätisches Grauvieh und Freiberger Pferd sind ussterbendi Arte und stönd underem Schutz vo de schwizer Stiftig „Pro Specie Rara„. Ich han letzti welle die paar regelmässigste Ziistigsträningsbsuecher bi dere Stiftig aamälde, aber es göchi nöd. Sie nämed nume Tier und Pflanze i ihres Schutzprogramm uf. Schade schade.  Im Ernst, wemmer nur zvierte oder zfeuifte isch, isches eifach würkli müehsam. Raffed eui doch uf und bsueched s’Training wieder öfter. Es macht nämli mega Spass wen gnueg sind. Hemmer das Jahr ja au scho erläbt.

So, gnueg gjammeret. Chömmed mer zu de würkli erfreuliche Aaläss wommer das Jahr ja au einigi hend chöne erläbe. S’Chäsfest im März zum Bispiel. Nach de bescheidene Teilnehmerzahl im 2012 hend im 2013 wieder 73 Persone de Event bsuecht und Spass ghat am zämehöckle, Raclette ässe und es Glesli Wy trinke.

S’Mittwuchs Wandere isch nach wie vor sehr beliebt und mer ghört mer nur Guets vo de Oldtimer-Front. Die Usflüg werded rege bsuecht und sind en Fixpunkt i de Agenda vo vielne vo euisne Pensionierte Sporting Kollege. Ich freui mi scho uf’s pensioniert si, weni den det au chan mitwandere. Im Fustball isch die ersti Mannschaft vo de FB i de Summermeisterschaft us de 1.Liga i die 2.Liga abgstiege. Ghört irgendwie au chli zum positive i mine Auge, will i de 1.Liga simmer doch mengisch zimli überforderet gsi. 2. Liga isch optimal für euis.

D’Bergtour is Sertigtal, organisiert vom Harry, isch wie jedes Jahr de Aalass gsy wommer nöd het därfe verpasse.          17 Sportingler hend sichs nöd nä la, trotz spärliche Info’s, zur rächte Zit am richtige Ort s’sy. De mit de Info’s het de Harry na es paar Mal müesse ghöre, aber er het sich nöd us de Rueh bringe la und alles het bestens klapped. S’Wätter isch bländend gsy, d’Unterkunft au. Ussert de Saal bim Nachtässe, de isch doch zimli überheizt gsy, aber das chammer nöd em Harry aa chriede. Am Sunntig isches den vo Sertig nach Davos gange. Die Einte teilwis es Stuck mit em Postauto, die andere Alles z’Fuess und es het sogar na glanget en Abstächer in Wald z’mache und paar Eierschwämm und Steipilz z’finde.

D’WM het das Jahr wiederum im Fondli stattgfunde. 21 Teilnehmer hend i 5 Teams um de begehrti WM Pokal gspielt. Neu-Organisator Andy het das Turnier bestens über d’Bühni bracht. Paar Sache wie s’organisere vo Bäll und Leine und d’Uslosig sind na biz verbesserigswürdig. Aber das sind Details. Wichtig isch:  All wo gspielt hend sind begeistered gsy und hend Freud gha a de WM und de Gschänkli wommer het chöne günne.

Chäsfest, Bergtour, WM oder Mittwuchswandere. Das sind so Aaläss wo nöd därfed stärbe, das sind euisi Vereins-Highlights. Nämed dra teil wen immer ihr chönd. Reserviered eui die Date, sie sind bekannt. Ohni Teilnehmer gits au die Aläss nöd und ohni Teilnehmer sind d’Organisatore frustriert und en frustrierte Organisator macht keis zweits Mal meh öppis.

Ich hoff das mir au im 2014 wieder werded zäme spörtle, zäme d’Kameradschaft pfläge, zäme schaffe und zäme fäschte. Mached alli mit, den nur so bliebed mir de Sporting Satus Dietike.

 

„el Presidente“