Hmm.. der Jahresbericht…. Wieder mal isch es Jahr ume und d’GV staht vor de Tür. Und wieder mal erwiest sich de Jahresbricht als Knackpunkt vo de GV Vorbereitig. Aber nur kei Panik, ich han na rund siebe Stund bis d’GV aafangt und irgendwie hanis na immer gschafft. Obwohl es isch ja eigentlich scho fast alles gseit zum 2015 under em Tranktandum Mitteilungen. Villicht müessti mal d’Mitteilige us de Traktandeliste kippe, dänn wärs au eifacher de Jahresbricht z’verfasse.

Mir hend das Jahr s’erst Mal sit 2006 keis Chäsfest meh gmacht, will sich immer weniger Sportingler defür interessiert rsp teilgna hend. Und das isch es gueti Entscheidig gsi. S’Chäsfäst isch dur es Grillfäst im Summer ersetzt worde und so wie’s usgseht hend Sportingler lieber Fleisch, Salat und Bier als Chäs, Herdöpfel und Wiiswy. D’Amäldige für de Aalass churz vor de Summerferie hend sich zwar in Gränze ghalte, aber schlussendlich sind doch sehr viel Lüt aawesend gsi. Jung und Alt, Männlein und Weiblein hend de schöni Summerabig i de Vogelau gnosse. Sporting Mitglieder und Partner und au Partnerinne vo verstorbne Sporting-Legände hend sich gfreuit de Abig zäme z’verbringe. Die feine Salät und Dessert wo vo de Teilnehmer mit bracht worde sind, hend d’ghulfe s’Budget z‘schone. Und sowieso isch das Fäst vo Aafang aa als „non-profit“ Fest deklariert gsi. Söttigi Fester mached en Verein us und söttigi Fester fördered s’Mitenand vo Jung und Alt. Nöd nur d’Teilnehmer hend Freud gha, au em OK hetts sehr gfalle. Und will mir de Meinig sind dass das Grillfest viel besser zum Sporting passt, als das es s’Chäsfest je ta het, isch’s Chäsfest scho fast vergässe. Es wird au im 2016 wieder es Grillfäst i de Vogelau gä. Reserviered eui de 15. Juli, d’Hütte isch scho reserviert.

Aber jetzt wird’s schwirig mit brichte. Will usgrächnet a de Bergtour het s’50 Jahres Jubiläumsfest vo de Bude woni schaffe stattgfunde und das hani natürli nöd chönne und welle verpasse. Das aber schlussändlich nume 14 Sportingler mit em Mirko is Tessin uf d’Bergtour sind, stimmt mi scho chli nachdänklich. 14 isch negativ Rekord vo de letzte Jahre, wenn nöd sogar Jahrzehnte. OK, allzu viel meh simmer amigs scho nöd gsi und wenn’s den de Eint oder Ander mit me andere wichtige Termin tüpft, sinds schnell mal wenig. Aber Einzel/Doppelzimmer versus Masseschlag sött keis Kriterium si für d’Nichtteilnahm, findi.  Sone Nacht im Masseschlag isch nöd so schlimm und mit eis zwei Bierli meh und  Ohropax schlaft mer au det sehr guet. Bergtoure sind immer toll und lustig. So nachem Motto „Wehe wenn sie losgelassen“.  Gnüssed doch das Aagebot. 17.-18. Sept 2016 gahts uf d’Glattalp.

Es Wucheänd später den d’Papiersammlig. Au det hani dur Abweseheit glänzt. Mis jährliche Fischer/  Pilzer Weekend mit zwei Arbeitskollege isch genau uf de Termin gfalle und ich han mir erlaubt nach  gfühlte 247 Papiersammligsteilnahme für einisch nöd debi z’si. Sorry Roli, chunnt nüme vor. Aber au det, wenn de Wurm drin isch ischer drin. Diversisti Lüt sind us diversiste Gründe nöd debi gsi. Hey, ohni Geld vo de Papiersammlig simmer ines paar Jahr tot. Das isch würkli na euisi letzti Iinahme-quälle und die müemmer eifach chöne hebe. Es brucht würkli all. Klar, mir chömmed all langsam is Alter, aber es git na paar anderi Ufgabe a de Sammlig als uf de Wäge hocke und Papier biege. Und mer chan nur en halbe oder drittel Tag go hälfe, me muess es eifach em Roli säge. Er findet sicher es passends und entsprechends Jöbli. Drum bitte de 20. August 2016 gross i de Agenda iiträge.

Meh oder weniger s’gliche Bild den bi euisere WM. Mit Ach und Krach het de Andy chönne vier Mannschafte zämestelle. Diversi Gründ hend au da zu wenig Teilnehmer gfüehrt. Was i a de WM aber chli vermisse sind d’Kamerade vom Fritig. S’Niveau isch nüm so höch, niemert muess Angst ha. Es spieled z.B au d’Kids vom Dominik mit. Liebi Fritigsturner, chömmed doch au mal a d’WM.

Das de Sporting immer na e beliebti und bekannti Adrässe isch hani Wiehnacht/Neujahr dur en Brief usem Wallis und dur es Telefon us Paris müesse erfahre. Zwei älteri Herre hend es Präsidentejöbli gsuecht. Ich han den aber em Seppi und em Michel müesse erkläre, dass es bi euis um Fustball und nöd um Fuessball gaht und das bi euis kei schöni Weltreisli gmacht werde chönd und das mir kei Millione hend zum sich gägesitig ufs Sparkonto schiebe und das min Job sowiso nöd zur Verfüegig staht. In diesem Sinne hoff ich das mir au das Jahr wieder werded zäme spörtle, zäme d’Kameradschaft pfläge, zäme schaffe und zäme fäschte. Mached alli mit, denn nur so bliebed mir de Sporting Satus Dietike.

 

„el Presidente“