Zum Glück isch hüt scho Samstig und nöd wie gester Freitag der Dreizehnte. Hetti min Bricht scho gester gschriebe wär er wahrschindli katastophal usecho. Ich bin ja nöd abergläubisch. Aber gester, am Fritig de drizähnti bini ufem Heiwäg. Biz im Stress wie immer, willi na öppis vor han. Bini also so am Heifahre uf de Autobahn. Plötzlich, 50 Meter vor em Gubrist, schalted beidi Ample uf Rot. Nichts geht mehr. Tunnel gsperrt. Hmm…super. Ich ränkle min Panda ganz links a d’Mittelleitplanke, damits e Gass für d’Rettigs-fahrzüg git, stelle de Motor ab und warte. Nach ca ½ Stund warte fahrt den mal s’erste Polizeiauto in Tunnel,  5 Minute später s’Zweite. Irgendwänn, nachere gfühlte Ewigkeit schalted di linggi Ample uf Grüen und mer cha wieder fahre. Chönnti wieder fahre, wenn den s’Auto aspringe würd. Aber de Panda zündet nüm. 1000 mal versuecht, aber nei, er lauft nüm. Super Sach so im Auto wo nüm fahrt uf de lingge Spur wo all in Gubrist ine wänd. TCS hani dänkt und versuecht aazlüte. Aber irgendwie will mis Handy kei Verbindig ufbaue. Versuecht und pröblet, da gaht plötzlich d’Biifahrertür uf und en Polizist luegt ine. „Was isch passiert?“  Batterie im Eimer, er zündet nüm. OK, mir tüend sie abschleppe, das sie da wäg chömmed. Stieged sie mal us. Phuu, gerettet hani dänkt. Dusse frägt mi de Polizist: „Hend sie en Abschlepphagge?“  En Abschlepphagge?  Han für mich dänkt a) woher sölli ez auf die Schnelle en Abschlepphagge her nä und b) was isch das überhaupt, en Abschlepphagge. Zum Polizist hani gseit äähmmm öhhhh, Weiss nöd.  Mached sie mal de Kofferrum uf. Und tatsächlich het er den bim Ersatzrad sonen Abschlepphagge gfunde. Jetzt weissi wenigstens au was das für es Teil isch. So hend’s mi den chönne Abschleppe und irgendwänn bini au dihei gsi. Ihr fräged eui jetzt wahrschindli: Und was het das mit dem Sporting z’tue. Das weissi nanig, uf all Fäll isch’s  emal en Afang und chan vilicht na verwändet werde.

S’Sportingjahr 2016 het guet aagfange. D’Skiwuche i de Flumsi isch sehr guet bsuecht gsi. 32, 33 Teilnehmer sind gsi. Am Grillabig sogar 39.

Am 8. April hend mir euis wieder emal es Vorstandsässe gegönnt. Organisiert vom Hugo mit Hilf vo de Janine hets i de Waldhütte Berike es feins Fondue Chinoise gä. Fast de ganzi Vorstand mit Anhang het teilgna und es isch en lustige Abig gsi.

Als positiv und s’eigentliche Highlight im Vereinsjahr han ich s’Grillfäst in Erinnerig. 44 Teilnehmer hend de tolli Aalas im Chüngelizüchter Clubhus bsuecht. Mir hend fein gässe, viel gschwätzt und trunke und am Schluss het sich jede fröhlich und beschwingt uf de Heiwäg gmacht.

Lässig hani au d WM gfunde, eifach will s WM na git und willi gärn Fustball spiele und willi d WM scho immer toll gfunde han. Aber hey, knapp 16 Lüt, 4 Teams und au nur will diversi Gäst wo nöd im Sporting sind mitgmacht hend. Warum gseht mer nie öppert wo am Fritig turned a de WM ?

Und sust?  Da na paar Zahle wo zum Nadänke sötted aarege. Jasse am 29. April.  10 Teilähmer. Stell mer vor das meh als 10 Sportingler gärn jassed. Wo sind die gsi ?

Halbjahresversammlig 15. Juni: 17 Awesendi, au nöd grad berauschend.

Papiersammlig 20. August. De Roli chan es Liedli singe wie müehsam das es isch Lüüt z’finde wo hälfed  Bergtour Glattalp 17/18. September. Wär sie wägem Wetter nöd abgseit worde, wäred nur 12 Wanderer uf dere Tour gsi. Absolute Minusrekord für e Bergtour.

Chegle am 14. Oktober: 6 Teilnehmer. Da langet ja fast ei Bahn und es 10er Pack Bier.

Fustball: im Eis sind mir dur de Zämeschluss vo zwei Mannschafte nominel eigentlich 13-14 Lüt. Ihr glaubed aber nöd wie astränged das es isch, dass mer jewils a de Spieltäg 6 und nöd nume 5 Spieler sind. Halletraining am Zistig:  Das het glaub i dem Winterhalbjahr meh Nöd stattgfunde als stattgfunde.  Ich schrieb fäng jede Zistig um die 2 ume es Email:  hey, mir sind erst 5, wie gseht’s bi dir, bi dir und dir us?

A was fählts ? Klar simmer immer weniger Mitglieder und werded immer älter. Aber das elai chas ja nöd sie, das immer weniger Lüt euisi Aläss bsueched. Villicht fählts amene Abschlepphagge ? Het jede sonen Abschlepphagge chönnted mer enand zu de Aläss abschleppe. Ich meins im dem Sinn, dass mer de Kolleg söll mitnäh oder motiviere das er au mitchunnt. Weni mi a d’Bergtour aamälde, denn machi au Werbig defür, säge am Fritz und Franz. Hey, ich gang uf d’Bergtour, wär cool wen ihr au chömmted. Gani go Chegle, frägi de Kurt ob er au chunnt, willi weiss das de Kurt gern cheglet.

In diesem Sinne hoff ich das jede im 2017 sin Abschlepphagge viel wird iisetze, so das mir au das Jahr chönd zäme spörtle, zäme d’Kameradschaft pfläge, zäme schaffe und zäme fäschte. Mached alli mit, denn nur so bliebed mir de Sporting Satus Dietike.

„el Presidente“