Was isch so gloffe im 2017? Mir hend im April gjasset, mir hend im Juli es lässigs Grillfäscht gha wo ich find, das es es super Aalass isch. Es sind mit 41 Teilnehmer viel Lüt gsi, aber ich denke, das Fest hetti na meh Lüt verdient. Im Summer hemmer meh oder weniger erfolgrich Fustball gspielt. D‘ Mittwuchswanderer sind viel underwäx gsi und hend ihri Reisli gnosse. Im Dezember isch die traditionelli WM ustreit worde. 21 Fuster und Fusterinne vo nah und fern sind im Fondli gsi. Leider hät d Iladig an Satus Wipkinge nöd gfruchtet, aber vilicht klappets ja im 2018. D’WM isch en Alass wo all Teilnehmer immer sehr viel Freud dra hend und ich finde au d’WM hetti meh Teilnehmer und au Bsuecher verdient.
Mis persönliche Highlight, wie meistens, isch d’Bergtour gsi. Leider hend sich nur grad 9 Wanderer uf die tolli Tour begä. Ufteilt i zwei Seilschafte hemmer uf zwei verschiedene Route de Ufstieg i d’Glattalp under d’Füess gna. En aafänglich steile stränge Ufstieg isch denn dur e wunderbari Karst Hochebeni und eme Zwüschestopp imene Alpbeizli belohnt worde. Denn isches na quer dur de Schnee i dere Ebeni und namal über en verdammte huere Grat inne gange, bis mer denn durab i d’Glattalp cho sind. Det isch scho d’Seilschaft Nr. 1 im Berggasthof ghöcklet und het bime Bierli uf euis gwartet. Denn s’übliche Bergtour Programm….Namal es Bierli, Masseschlag bezieh, Apéro, Znacht, dumm schnurre, vilicht namal es Bierli oder en Kafi, pfuse, ufstah, Zmorge ässe und de zweiti Tag in Agriff nä. Es hät wieder zwei Grüppli gä. Die einte sind um dä Glattalpsee, was die andere am Vortag scho gmacht händ. Und die andere sind suscht chli nöimed ume gschuenet. Vor em Abstieg hämmer euis den wieder troffe und es sind zwei neui Teams bildet worde. Die Einte sind zFuess, die Andere mit dä Berg, resp. Talbahn is Tal. Vo det us isches denn irgendwann mal zrugg is Limmattal gange. Mir hets mega pässlet und ich chan euisi Bergtoure eifach nur empfehle. Egal ob mer laufe mag oder nöd eso, es git immer e Variante wie mer chan debi si. Ebä, au d’Bergtour hetti meh Teilnämer verdient.

Das wär jetzt chli en churze Jahresbricht, drum hani mal mini alte Bricht aglueget, zum na e Idee übercho de 2017-Bricht chli z’strecke. Und siehe da, ich han usegfunde, das ich jetzt min 20zigste Bricht am schriebe bin. D.h. ich bin scho 20 Jahr Präsident da. Eigentlich en guete Ziitpunkt zum mal en chline 20 Jahres Rückblick z’mache.

1998 Im 98zgi, mim erste Jahr als Präasi, hend mir zäme mit de Fraueriege i de Dornau euises 50-Jahres-Jubiläum gfieret. Es het dä ganz Abig grägnet was es het abemöge. Eigens zu dem Aalas hend mir rote und wiise Jubiläumswy mit eigene Etikette kreiert. Im Fustball isch die ersti Mannschaft i d’1. Liga ufgstige und die 2. Mannschaft het de Ufstieg i d‘ 2. Liga gschafft.
1999 Nach de WM&EM hets i de undere Turnhalle vom Steimürli es Fondue gä. Über 40 Persone sind aawesend gsy.
2000 De Sablotny organisiert Sporting T-Shirts mit euisem Emblem vornedruf. Gääl und Grüen sindsgsy. Und will de Marka Sport en Fähler gmacht het, hemmer au no Graui T-Shirts übercho. D’Fraue nämed erstmals mit zwei Mannschafte a de Meisterschaft teil.
2001 Am 7. April brännt d Stadthalle ab. Mer rächnet ca. 2 Jahr, bis mer wieder e Abigunterhaltig chönd durefüere. En schmerzliche Ihnahme Usfall für de Sporting und de Satus. Im Herbst de Fustballerisch Saisonhöhepunkt. Ufstiegsspiel id Nati B. Aber de Ufstieg wird verpasst. Zur Usträgig vom 45. Limmattaler Hallefustballturnier chunnts nöd. Es mälded sich zwenig Teams aa. Somit isch das Turnier beärdigt und es bliibt bi 44 Usträgige.
2002 Am 4. Feb. wird www.satusdietikon.ch ufgschatet. Mir günned es starch bsetzt Uffahrtsturnier und träged im Steimürli es heiss umkämpfts Cup-Spiel gäge dä CH-Meister Jona us. De Roli fiiret sini Premiere als Papiersammligs Chef.
2003 De Sporting organisiert i de Riithalle es Summernachtsfäst für dä gsamti SATUS Dietike. Risotto, halbi Güggeli, Füürwehr-Bier-Auto, Chuefladelotto sind es paar Stichwörter dezue. A de WM/EM gits eRekordbeteiligung. 8 Mannschafte è 5 Spieler nämed teil.
2004 de Name Sporting fiiret sis 10 jährige Jubiläum. Cupspiel gäge de CH-Meister Rickenbach-Wile. Erste Satz hemmer gunne, dänn händs öis aber dGränze ufzeigt. Ufstiegsspiel Nati B in Alpnach. Schlächti Leistig zeigt und all Spiel verlore.
2005 En Meilestei i de Fustballgschicht, resp. i de Vereinsgschicht vo Dietike. Die vereinsübergriffendi FB Dietike wird is Läbe gruefe. De Hauptverein fiiret sis 75 Jahres Jubiläum.
2006 I de 93zigste Minute, Sekunde vor Schluss schüsst de Filipescu in Basel de FCZ zum Meistertitel. De Peter Ley tritt als Präsi vom Hauptverein zrugg. Mir organisiered zum erste Mal s’Chäsfäscht i de Riithalle
2007 D Abigunterhaltig isch gstorbe. D’Fraue wäred theoretisch a de Feldmeisterschaft id Nati B ufgstige, aber es wird e falschi Rangliste wiitergreicht und so werdeds nöd iglade. Das merkeds aber erstim 2008, wo de hinter ihne Platzierti plötzlich i de Nati B spielt.
2008 Am 8. Mail 2008 isch de Sporting, resp. d Männerriege 60 Jahr alt worde. Das wird nach de WM/EM im Turnchäller mit eme Fondue gfiiret wo rund 70 Lüt aawesend sind. D’Fraue spieled im Winter Nati B. s Eis schafft de Wiederufstieg i die 1. Liga.
2009 D SATUS Nachrichte sind gstorbe.
2010 I mim Jahresbricht riit ich uf de Zahl 168 ume. 168 sind die zäme zellte Amtsjahr vom damalige Sporting Vorstand. De Willy Feurer tritt nach 31 Jahr Vorstandsarbeit, wovo 17 Jahr als Präsident, usem Vorstand zrugg.
2011 D’Fustball Fraue spieled im Feld Nati B, i de Halle sogar Nati A. De Stadtspieltag stirbt wege zwenig Aamäldige. D’Fraueriege vom SATUS löst sich uuf.
2012 Am 8. Februar stirbt de Stocki. D Fraue Fusterinne höred wege zwenig Spielerinne uf. Das nachdem sie im Winter de Ligaerhalt i de Nati A gschafft hend. A de delegierte Versammlig vom Hauptverein wird erstmals offiziell dikutiert, wie mer de HV uflöse chönnt.
2013 Am 23. April, i sim 92. Läbesjahr stirbt euise Ehrepräsident de Ernst Basler. 68 Jahr isch er überusaktivs Mitglied gsi. Langjährige Präsident vo de Männerriege und au vom Hauptverein isch er gsi. Mer chan gar nöd alles ufzelle, wo er für dä Satus gleischtet hät.
2014 Vor euisere GV findet d’Uflösig vom Hauptverein statt. D’Jugi chunnt zu euis. Mir hend de längsti Schnuuf gha und sind die letschti Satus Dietike Riege wo’s no git. S’Chäsfäscht wird s letschte Mal duregfüert.
2015 Ersti Usgab vom Grillfäscht im Summer i de Vogelau
2016 Letschti Papiersammlig vom Sporting. Brgtour i d’Glattalp wird wege schlächt Wätter abgseit.

So, das wär en churze Rückblick uf die letzte 20 Jahr Vereinsgschicht gsi. Das Jahr, im 2018, wird euisi Riege 70 Jahr alt und ich hoffe, es wird sie na lang gä. Ich freu mi jetzt scho uf d’Reis is Piemont mit möglichst vielne Teilnehmer.
Ich hoff das mir au das Jahr wieder werded zäme spörtle, zäme Kameradschaft pfläge, zäme schaffe und zäme fäschte. Mached alli mit, denn nur so bliibed mir de Sporting Satus Dietike.

„el Presidente“