Papiersammlig, GV Hauptverein, Frühlingsversammlung, Jassen, Faustballmeisterschaft und Cup, Damenmeisterschaftsspieltag, Auffahrtsturnier, Wiwahe Hurot-Fest, Velo-Tour, Steinstossen, Sommer-versammlung, 50-Jahre Jubiläumsfest, Stadtspieltag, Frauen- und Männerriegentag, Frankreich-Tour, Aufstiegsspiele 1.Liga und 2.Liga, Chegle, Herbstversammlig, Limmattaler- Hallenfaustballturnier, Abigunterhaltig, WM-EM und jetzt na d’GV. Es chan also niemmert säge, im Sporting seg im 1998 nüt glofe.
So het min erste Jahresbricht won i fürs Jahr 1998 gschriebe han, aagfange. Rund 25 verschiedeni Pünkt hani det chöne ufzellä. Tja, 2009 isch nöd 1998. Wen i so vergliche, gits einigi Aläss wo unterdesse gstorbe sind. Das wäred Steinstosse, Herbstversammlig, Chegle, Limmattaler-Hallefustballturnier und d’Abigunterhaltig. Den gits na es paar wo halt nöd stattfinded wills keis Jubiläumsjahr isch z.b. oder s’Chegle isch durs Boccia ersetzt worde oder es git sogar neui Aläss wie s’Chäsfäscht oder Faustballer im Schnee. Tendenziell sind scho chli weniger Aläss, aber ich denke es lauft immer no gnueg im Sporting.
S’Sporting Jahr fangt eigentlich immer mit de GV a. Das isch nöd immer so gsi, frühner het d’GV na im suscht scho überladene Dezember stattgfunde. Im Jahr 2000 hemmer die letzti Dezember GV abghalte, den hets währed em Jahr 2001 kei GV gä, will d’GV 2001 im Januar 2002 über d’Bühni gange isch.
Ufhöre tuets Sporting Jahr normalerwis mit de WM / EM. Dezwüsched findet all die viele Sporting Aläss statt wo ihr alli bestens kenned. Wen ihr eine nöd känned wär’s doch i dem Jahr die besti Glägeheit emal dra teilznäh. Känner vom Verein denked sich jetzt im Stille: Ja, ja, …dä macht so Sprüch isch aber sälber na nie anere Velotour oder am Boccia gsi. Da hend’s ja scho rächt und wen sie das im Stille denked isch mir das glich. Defür hend die wenigste vo eui mal e GV oder suscht e Versammlig gleitet. Simmer also wieder quit. Und übrigens, das Jahr han i ja wellä spontan a d’Velotour cho. Ich chan ja au nüt defür das d’Wätterlag so schlecht gsi isch. Nach 29 Jahr het de Roman zum erste Mal e Velotour müesse absäge. Und er isch mit sinere Prognose goldrichtig gläge. Es wär wohl nöd sones gmüetlichs Velofahre und Fäst bi ihm im Garte worde.
S’Chäsfäscht im März isch au das Jahr en volle Erfolg gsi. Rund 80 Persone us allne Riege händ de Saal gfüllt und em Peter Ley sini Musig het zur Gmüetlichkeit biitreit. Mit 130 Portione Raclette isch de Hunger vo de Lüt gstillt worde. Über d’Getränkestatistik sägi nüt. Ich hoffe das au zu de föifte Usfüehrig, wo im März 2010 stattfindet, wieder möglichst viel Vereinsmitglieder de Wäg i d’Ritthalle im Fondli findet.
D’Bergtour het euis das Jahr nach Amde gfüehrt. 22 Wanderer hend die beide Täg gnosse. Am erste Tag simmer rund um de Mattstock gwanderet. Die einte sind den sogar na uf de Speer ue. De Heinz Müller isch au mit ue, will ihm de Andy gseit hät es hebi ä Beiz dobe. Die andere sind i de Alpwirtschaft Oberchäsern bime Bierli blibe und hend chli gjasset. Am zweite Tag simmer mit em Postauto nach Arvebüel und vo det uf d’Alp Vorder Höhi gloffe. Wieder die einte und teilwis au die andere, hend vo dere Alp us na de Gulme bestige. Troffe hend sich den all wieder innere Alpwirtschaft wo mer wider gmüetlich het chöne es Bierli trinke. Da d’Phonak bekanntlich nüm im Radsport-Sponsoring engagiert isch, werded mir wahrschindli s’nächst Jahr um en Biitrag a euisi Bergtour aafräge. Das isch sone Bieridee gsi a de Bergtour, will d’Phonak ja fast ihre halbi Jahresumsatz mit Sportingmitglieder macht.
Mir hend natürli au Fustball gspielt im Jahr 2009. Aber ich han vom Dominik es Verbot übercho, öppis vom Fustball i mim Bricht z’erwähne. Alles zum Fustball ghöred ihr bald i sim Bricht.
S’Jahr 2009 wird au i d’Satus Dietike Gschicht iiga, will i dem Jahr d’SATUS-Nachrichte gstorbe sind. Wahrlich kein Ruhmesblatt, aber leider isches so. Mir hetted zwar na öppert extern gfunde gha wo für relativ wenig Geld am Beat Bührer sin Job vom Layout übernah het, aber de Job vom Redaktor und s’Inserate beschaffe het niemert welle übernäh rsp wiiterfühere. Schade, schade, schade. Em Satus Dietike sis Ushängeschild gits nüme und die fette Inserate Iinahme werdet i de Hauptverein Kasse fähle.
So, d’Site isch langsam voll. Im ewige Kampf „Reto gäge Jahresbricht“ stahts somit 12:0 für mich.
Ich hoffe das mir au im 2010 chönd zäme Sport tribe, zäme d’Kameradschaft pfläge, zäme schaffe und zäme fäscht. Mached alli mit, den nur so bliebed mir was mir sind. En gsunde Sporting Satus Dietike.